അമീന അസൈലിമി - കൊടുങ്കാറ്റുകൾക്കൊടുവിലെ വസന്തം

   

അളവറ്റ ദയാപരനായ പ്രപഞ്ചനാഥന്റെ നാമത്തിൽ..

അമേരിക്കയിലെ ഇന്റർ നാഷണൽ യൂണിയൻ ഓഫ് മുസ്ലിം വിമൺ എന്ന സംഘടനയുടെ മുൻ പ്രസിഡന്റായിരുന്നു അമീന അസൈലിമി.

  ഇസ്ലാം സ്വീകരിക്കുന്നതിനു മുമ്പ് അവർ  ഒരു ബാപ്റ്റിസ്റ്റ് കൃസ്തീയ കുടുംബത്തിലെ അംഗമായിരുന്നു. അമേരിക്കൻ വനിതകൾക്കിടയിൽ അഭൂതപൂർവമായ വളർച്ച കൈവരിച്ച അമീന അസൈലിമിയുടെ പ്രബോധന പ്രവർത്തനങ്ങളും പ്രഭാഷണങ്ങളും മൂർച്ചയേറിയ എഴുത്തും ചുരുങ്ങിയ കാലം കൊണ്ട് ലോക വ്യാപക ശ്രദ്ധ നേടിയെടുത്തു. തന്റെ  മരണം വരെ ഇസ്ലാമിക പ്രവർത്തനങ്ങൾക്കു് മുൻ തൂക്കം നൽകിയ അമീന വെട്ടിത്തെളിച്ച പാതയിലൂടെ ഇസ്ലാം പുൽകാൻ ദിനം പ്രതി കടന്നു വരുന്നത് പാശ്ചാത്യ പ്രമുഖരുടെ നീണ്ട നിരയാണ്. ദൈവിക ദർശനത്തിന്റെ പ്രസക്തി നശിപ്പിക്കാൻ തീവ്രവാദ ആരോപണങ്ങൾക്കു് കഴിയില്ല എന്നതിന്റെ വർത്തമാനകാല ഉദാഹരണമാണ് ഇവരുടെ ഇസ്ലാം പ്രവേശനവും പ്രബോധന പ്രവർത്തനങ്ങളും.

         ഇസ്ലാം ആശ്ലേഷിച്ചതിന്റെ പേരിൽ നിരവധി പ്രതിസന്ധികൾ തരണം ചെയ്യേണ്ടി വന്ന അമീന അസൈലിമിയുടെ ചരിത്രം ഒരുപക്ഷേ  ഭാവനകൾക്കും അപ്പുറത്താണ്. ചെറുപ്പം മുതൽ  അതിസമർഥയായിരുന്ന അവർ വിദ്യാഭ്യാസ കാര്യങ്ങളിൽ മറ്റു കുട്ടികളേക്കാൾ ബഹുദൂരം മുന്നിലായിരുന്നു. നിരവധി അക്കാദമിക് ബഹുമതികൾ ലഭിച്ച അസൈലിമി തന്റെ യൗവ്വന കാലഘട്ടം ഗവേഷണാത്മകമായ നിലയിലായിരുന്നു വിനിയോഗിച്ചത്. 

      

         ഏതൊരു കൃസ്ത്യാനിയെയും പോലെ അസൈലിമിയും ഇസ്ലാമിനെ കുറിച്ച് കേട്ടറിഞ്ഞ കഥകളിൽ മുൻവിധി ധാരാളം കലർന്നിരുന്നു. അവരുടെ ജീവിതത്തിൽ  വഴിത്തിരിവായത് 1975ൽ ലഭിച്ച ഒരു സ്കോളർഷിപ് ആയിരുന്നു. ഇതിൻപ്രകാരം കമ്പ്യൂട്ടർ വിദ്യാഭ്യാസത്തിനായി ഓക്കോഹാമ പട്ടണത്തിൽ എത്തിയ അസൈലിമി  തന്റെ സുഹൃത്തുക്കളാകാൻ പോകുന്നവരെ കണ്ട് അമ്പരന്നു.അവിടത്തെ  വിദ്യാർഥികളിൽ ഭൂരിഭാഗവും അറബ് വംശജർ ആയിരുന്നു .

          "ഒട്ടകം മണക്കുന്ന ഈ കാടന്മാർക്കൊപ്പം പഠിക്കാൻ തനിക്കു പറ്റില്ല" ഭർത്താവിനോട് അവർ ക്ഷുഭിതയായി പറഞ്ഞു. എന്നാൽ അദ്ദേഹം പുഞ്ചിരിച്ചു കൊണ്ട് അസൈലിമിയെ സമാശ്വസിപ്പിച്ചു. "ഈ അറബ് വിദ്യാർഥികളിലേക്ക് കൃസ്തീയ ദർശനത്തിന്റെ മഹത്വം പകർന്നു നൽക്കാൻ നിനക്കു കഴിയും. വളരെ വേഗം അവരെ കൃസ്ത്യാനികളാക്കാൻ സാധിക്കും. അതിനായി പരിശ്രമിക്കൂ" എന്ന ഭർത്താവിന്റെ  വാക്കുകളിൽ കഴമ്പുണ്ടെന്നു തോന്നിയ അസൈലിമി താൻ കൈവരിക്കാൻ പോകുന്ന സാംസ്കാരിക നേട്ടത്തിൽ  അഭിമാനിച്ചു. ഒരുപക്ഷേ ഈ കമ്പ്യൂട്ടർ പഠനം കർത്താവ് തനിക്കു നൽകിയ ഒരു അവസരമായിരിക്കാം എന്ന വിചാരത്തോടെ അവർ തന്റെ സ്കോളർഷിപ് പഠനം തുടരാൻ തീരുമാനിച്ചു.

  

        കമ്പ്യൂട്ടർ പഠനവും അറബ് യുവജനങ്ങളോടുള്ള അറപ്പ് കലർന്ന  സഹകരണവും തുടർന്നപ്പോൾ എത്രയും പെട്ടെന്ന് ഇസ്ലാം ഒരു കെട്ടുകഥയാണെന്ന് തെളിയിച്ച് "സംസ്കാര ശൂന്യരായ" സഹപാഠികളെ "നേർവഴിക്കു നയിക്കാൻ" അസൈലിമി വെമ്പൽ കൊണ്ടു. "ഇസ്ലാമിന്റെ പൊള്ളത്തരം" വെളിച്ചത്തു കൊണ്ടുവരാൻ ഖുർആനിന്റെ ഇംഗ്ലീഷ്  പരിഭാഷ സഹപാഠിയായ അറബി വഴി  വാങ്ങി വായന ആരംഭിച്ചു.

     പക്ഷേ അവിടെ ചരിത്രം വഴിമാറുകയായിരുന്നു. ഖുർആൻ വാക്യങ്ങളുടെ അഗാധതലങ്ങളിൽ നിന്നും ആശയ വിസ്ഫോടനത്തിന്റെ മാസ്മരികത വിഴിഞ്ഞൊഴുകുന്നത്  അസൈലിമി അനുഭവിക്കാൻ തുടങ്ങി. അതൊരു കൊടുങ്കാറ്റിന്റെ മർമരമായിരുന്നു. വർത്തമാനകാല ജീവിതത്തിന്റെ രൂപഭാവങ്ങളെ ഉഴുതുമറിക്കുന്ന മാറ്റത്തിന്റെ ഋതുക്കൾ ഖുർആൻ വചനങ്ങളിലൂടെ തന്നിലേക്ക് സന്നിവേശിക്കുന്നത് ആദ്യമൊന്നും അസൈലിമി അറിഞ്ഞിരുന്നില്ല.

      

         ഖുർആൻ വചനങ്ങളിലെ താക്കീതുകളെ ധിക്കരിക്കാൻ കഴിയാതിരുന്ന ഒരു മാനസികാവസ്ഥയാണ് അസൈലിമിയിലുണ്ടായ ആദ്യ ചുവടുവയ്പ്. ശനിയാഴ്ച രാത്രികളിൽ ഭർത്താവിനോടൊപ്പമുള്ള ബാർ സന്ദർശനം അവർ ഉപേക്ഷിച്ചു; തുടർന്ന് പന്നി മാംസവും വർജ്ജിച്ചു. തന്റെ ഭാര്യയിൽ സംജാതമായിക്കൊണ്ടിരിക്കുന്ന പരിവർത്തനങ്ങൾ 'ഏതോ അജ്ഞാത സുഹൃത്ത്' സംഭാവന ചെയ്തതാണെന്ന സംശയത്താൽ അവരുടെ ഭർത്താവ് അസൈലിമിയിൽ നിന്നും ഒഴിഞ്ഞു മാറുകയും ക്രമേണ അയാൾ വേറേ താമസം ആരംഭിക്കുകയും ചെയ്തു.

         സംവാദത്തിനു വേണ്ടിയും സഹപാഠികളായ  അറബികളെ 'സംസ്കാരികായി ഉന്നതിയിലെത്തിക്കാനും' അസൈലിമി തുടങ്ങിയ ഇസ്ലാമിക പഠനം അതോടെ വഴിത്തിരിവിൽ എത്തി. ഇസ്ലാമിന്റെ ധന്യ ശാന്തതയിലേക്കുള്ള പ്രവേശനമായി അതു മാറാൻ അധിക കാലം എടുത്തില്ല. 1977 മെയ് മാസത്തിൽ അസൈലിമി എന്ന ബാപ്റ്റിക് കൃസ്ത്യാനി അമീന ആയി രൂപാന്തരപ്പെട്ടു. അമീന അസൈലിമി എന്ന നാമധേയം സ്വീകരിച്ച അവർ താൻ കണ്ടെത്തിയ സത്യങ്ങൾ ലോകത്തോട് വിളിച്ചു പറയാൻ ഒരു പ്രബോധകയുടെ ഉത്തരവാദിത്വം തന്നെ ഏറ്റെടുക്കാൻ തീരുമാനിച്ചു.

     അമേരിക്കയിലെ അറിയപ്പെടുന്ന ബ്രോഡ് കാസ്റ്റിങ്ങ് ജേർണലിസ്റ്റായിരുന്ന അസൈലിമി അമീനയായി മാറിയതോടെ പല മേഖലകളിൽ നിന്നും രൂക്ഷമായ പ്രതികരണമാണ് ഉണ്ടായത്. വളരെ യാഥാസ്തിഥിക ക്രൈസ്തവ കുടുംബമായിരുന്നു അമീന അസൈലിമിയുടേത്. മകൾ മുസ്ലിമായതറിഞ്ഞ പിതാവ്  ശക്തമായാണ് പ്രതികരിച്ചത്. ഇരട്ടക്കുഴൽ തോക്കുമായി അമീനയെ വധിക്കാൻ തന്നെ അയാൾ പുറപ്പെട്ടു. പക്ഷേ ചരിത്ര നിയോഗം തന്നിലേക്ക് ഏല്പിച്ചിരിക്കുന്ന ദൈവം തമ്പുരാന്റെ കാവൽ അമീന അസൈലിമിയെ ഒരു പോറൽ പോലും ഏല്പിക്കാതെ കാത്തു രക്ഷിച്ചു.

        

         അമീനയെ തന്ത്രപൂർവം മാനസികരോഗാശുപത്രിയിൽ എത്തിക്കാനാണ് അവരുടെ സഹോദരി ശ്രമിച്ചത്. 'അറേബ്യൻ മാനിയ' താങ്ങാനാകാതെ അമീനയുടെ മാതാവും മുത്തശ്ശിയും ചീത്തവാക്കുകളും ശാപവചനങ്ങളും ചൊരിഞ്ഞുകൊണ്ട് അമീനയെ തള്ളിപ്പറഞ്ഞു  വേർപിരിഞ്ഞു.        

         കോപാകുലനായ ഭർത്താവ് ഇതിനകം തന്നെ വിവാഹ മോചനത്തിനായി കോടതി കയറിക്കഴിഞ്ഞിരുന്നു. തന്റെ തീരെ ചെറിയ കുഞ്ഞുങ്ങൾ അമീനക്കു ജീവനായിരുന്നു. പക്ഷേ  അവരെ വിട്ടു കൊടുക്കാൻ ഭർത്താവ് തയ്യാറായില്ല. ഇസ്ലാം മതം ഉപേക്ഷിച്ചു വന്നാലേ കുട്ടികളെ വളർത്താനുള്ള അവകാശം നൽകൂ എന്ന് കോടതി  അമീനയോട്   ശക്തമായി പറഞ്ഞു. കോടതി നൽകിയ ആനുകൂല്യം  രസാവഹമായിരുന്നു. 20 മിനിറ്റു നേരം അമീനയ്ക്കു പുനരാലോചനക്ക് സമയം നൽകി! പുതിയ മതം ഉപേക്ഷിച്ച് ഈ സമയ പരിധിക്കുള്ളിൽ വന്നാൽ കുട്ടികളുമായി പോകാമെന്നും അല്ലാത്ത പക്ഷം കുട്ടികളെ ഭർത്താവിനു നൽകുമെന്നും നൊന്തു പെറ്റ ഒരു മാതാവിനോട് കോടതി പറഞ്ഞപ്പോൾ അമീന നാഥനിൽ തന്നെ അഭയം തേടി. അല്ലാഹുവിന്റെ ഇച്ഛക്കു വിരുദ്ധമായൊരു ജീവിതം അമീന അസൈലിമിക്ക് ചിന്തിക്കാൻ കഴിഞ്ഞില്ല. തന്റെ ജീവിതത്തിലെ ഏറ്റവും വേദനാജനകമായ 20 മിനിറ്റുകൾക്കു ശേഷം വിശ്വാസ ദാർഢ്യത്തോടെ. ഹൃദയത്തിന് ചാഞ്ചല്യമില്ലാതെ വെറും കയ്യോടെ അവർ കോടതിയുടെ നീണ്ട പടികൾ ഇറങ്ങി. മനുഷ്യാവകാശ സംരക്ഷകർ എന്നു് വീമ്പിളക്കുന്ന അമേരിക്കയിലെ മനുഷ്യത്വ രഹിതമായ  ഈ കോടതി വിധി ഇരട്ടത്താപ്പിന്റെ മറ്റൊരു പര്യായമായി നമുക്ക് വിശേഷിപ്പിക്കാം.

      ഇസ്ലാം ആശ്ലേഷിച്ചതിന്റെ പേരിൽ തുടർന്നും അമീന അസിലിമി വേട്ടയാടപ്പെട്ടൂ കൊണ്ടിരുന്നു. ഇസ്ലാമിക വേഷം ധരിച്ച് ജോലി സ്ഥലത്തെത്തിയ അവരെ സ്വീകരിച്ചത് പിരിച്ചു വിടൽ നോട്ടീസ് ആയിരുന്നു. അങ്ങനെ ഒരിക്കൽ കൂടി വിശാല ഹൃദയമുള്ളവർ എന്നു നടിക്കുന്ന വെള്ളക്കാരന്റെ തനിനിറം അമീന തിറിച്ചറിഞ്ഞു. അലറുന്ന ആഴിത്തിരകൾക്കിടയിലെ നിയന്ത്രണം നഷ്ടപ്പെട്ട പായ്ക്കപ്പൽ പോലെ അമീനയുടെ ജീവിതം പ്രക്ഷുബ്ധമായി മാറി. പക്ഷേ ഒരിക്കലും അവർ തന്റെ നാഥനെയോ ദൈവിക ദർശനത്തെയോ തള്ളിക്കളയാൻ തയ്യാറായില്ല. മാതാപിതാക്കൾക്കും സഹോദരിക്കും മുൻഭർത്താവിനും എല്ലാം അവർ തുടർച്ചയായി കത്തുകളും കാർഡുകളും അയച്ചു കൊണ്ടിരുന്നു. അവയിലൊക്കെയും വിശുദ്ധ ഖുർആനിന്റെ വിസ്മയ ആശയങ്ങളുടെ ജീവൻ തുടിക്കുന്ന സന്ദേശങ്ങളായിരുന്നു നിറഞ്ഞു നിന്നിരുന്നത്. അവ ക്രമേണ അമീനയുടെ കുടുംബാംഗങ്ങളിൽ ഒരോരുത്തരുടെയും ഹൃദയങ്ങളിൽ വിള്ളൽ വീഴ്ത്താൻ തുടങ്ങി.

     

  നാഥൻ അത്ഭുതകരമായ മാറ്റമാണ് അമീന അസൈലിമിയുടെ കുടുംബത്തിൽ ഉണ്ടാക്കിയത്. ആദ്യമായി അവരുടെ മുത്തശ്ശി ഇസ്ലാമിന്റെ വെള്ളി വെളിച്ചത്തിലേക്ക് കടന്നുവന്നു. കൊച്ചുമകളുടെ മുമ്പാകെ സത്യ സാക്ഷ്യം മൊഴിഞ്ഞ അവർ വൈകാതെ മരണപ്പെടുകയും ചെയ്തു.

   

      ഭർത്താവിൽ നിന്നും വേർപിരിഞ്ഞ് മറ്റൊരാളെ വിവാഹം കഴിച്ചിരുന്ന അമീനയുടെ മാതാവ് ഇസ്ലാം പുൽകാൻ സന്നദ്ധയായി. അവർ മകളെ രഹസ്യമായി ഫോൺ ചെയ്തു വിവരം അറിയിച്ചു. അമീന അവർക്കു സാക്ഷ്യ വചനങ്ങൾ പറഞ്ഞു കൊടുത്തു. തൊട്ടു പിറകെ അമീനയുടെ അമ്മയുടെ രണ്ടാം ഭർത്താവും രഹസ്യമായി ഇസ്ലാംമതം സ്വീകരിച്ചു.  ഇരുവരുടെയും മതം മാറ്റം കുറേക്കാലത്തേക്ക് അവർ പരസ്പരം അറിഞ്ഞിരുന്നില്ല എന്നതാണ് കൗതുക കരമായ മറ്റൊരു കര്യം. 

        

         അമീന അസൈലിമിയുടെ കത്തുകൾ കഠിന ഹൃദയനായ പിതാവിനെയും പിടിച്ചുലച്ചു. ഒരു പ്രഭാതത്തിൽ അദ്ദേഹം മകളെ തേടിയെത്തി. മുസ്ലിം ആയതിന്റെ പേരിൽ ഇരട്ടക്കുഴൽ തോക്കുമായി വർഷങ്ങൾക്ക് മുമ്പ്മകളെ കൊല്ലാൻ തുനിഞ്ഞിറങ്ങിയ ആ പിതാവിന്റെ കണ്ണുകൾ നിറഞ്ഞൊഴുകുകയായിരുന്നു.കലിമ ഉച്ചരിക്കുമ്പോൾ ആ മനുഷ്യന്റെ ചുണ്ടുകൾ  പശ്ചാത്താപത്താൽ  വിറയാർന്നിരുന്നു. പിരിയുമ്പോൾ, ആ പിതാവ് മകളോട് ചെയ്ത ക്രൂരതകളൊക്കെ അല്ലാഹുവിനോട് തുറന്നു പറഞ്ഞ് ഹൃദയത്തിലെ കറകളും ഭാരങ്ങളും നീക്കം ചെയ്ത് ഒരു പുതിയ മനുഷ്യനായി മാറിയിരുന്നു.

      

        അമീനയുടെ കത്തുകൾ  ബന്ധുക്കൾക്കും പരിചയക്കാർക്കും നിരന്തരം ലഭിച്ചു കൊണ്ടിരുന്നു. അതിന് പ്രതികരണം എന്ന നിലയിൽ നിരവധി പേർ അവരെ തേടിയെത്തി ഇസ്ലാം സ്വീകരിച്ചു കൊണ്ടിരുന്നു. ഒരു ദിനം കുനിഞ്ഞ ശിരസ്സോടെ തന്നെ കാണാൻ വന്ന ആഗതനെ കണ്ട് അമീന അസൈലിമി ശരിക്കും ഞെട്ടി. തന്റെ  മുൻ ഭർത്താവ്...! താൻ ഒരു മുസ്ലിം ആയ സത്യം അദ്ദേഹം വെളിപ്പെടുത്തിയപ്പോൾ നാഥന് നന്ദി പറയാൻ അമീന ആകാശത്തിലേക്ക് കൈകൾ ഉയർത്തി. ദൈവിക ദർശനത്തിന്റെ  വെളിച്ചത്തിൽ തരളിതനായ ആ മനുഷ്യൻ താൻ ചെയ്ത തെറ്റകൾക്ക് അമീനയോട് മാപ്പ്  അഭർഥിച്ചു. 

    വിവാഹ മോചനത്തിനു ശേഷം മറ്റൊരാളെ വിവാഹം ചെയ്ത അമീന അസൈലിമിക്ക് ആ ബന്ധത്തിൽ ഒരു മകൻ ജനിച്ചിരുന്നു. 20 വർഷങ്ങൾക്ക് മുമ്പ് ക്രൂരനായ ഒരു ജഡ്ജി വഴി പിരിച്ച തന്റെ മക്കളിൽ ഒരാളെ മുസ്ലിമായി തന്നെ അമീനക്ക് തിരിച്ചു  കിട്ടി. ഭ്രാന്തി എന്ന മുദ്രകുത്തി  അമീനയെ  ചങ്ങലയിൽ തളക്കാൻ ആവുന്നത്ര ശ്രമിച്ച സഹോദരിയും ഇസ്ലാമിന്റെ തണലിലേക്ക്  നടന്നടുത്തു. കൊടുങ്കാറ്റുകൾ ആഞ്ഞു വീശിയിട്ടും സ്രഷ്ടാവിന്റെ മാർഗത്തിൽ സ്ഥൈര്യതൊടെ നിലകൊണ്ട അമീന അങ്ങനെ ചരിത്രത്തിലേക്ക് നടന്നു കയറുകയായിരുന്നു.

കടുത്ത ഇസ്ലാമോഫോബിയ വേട്ടയാടുന്ന അമേരിക്കൻ മനസ്സുകളിൽ ഒരു സുഖ ശീതള സ്പർശമായി നിറഞ്ഞു നിന്ന പ്രബോധകയായിരുന്നു അമീന അസൈലിമി. ഇവരുടെ ശ്രമഫലമായാണ് അമേരിക്കൻ ഐക്യ നാടുകളുടെ തപാൽ വകുപ്പിൽ ഈദുൽ ഫിത്വർ സ്റ്റാമ്പ് പുറത്തിറക്കാൻ ചരിത്രത്തിൽ ആദ്യമായി 2009 ൽ ആ രാജ്യം തയ്യാറായത്. 

        

         താൻ വിശ്വസിച്ച ആദർശത്തിനു സ്വന്ത ജീവിതം കൊണ്ട് വ്യാഖ്യാനം എഴുതിയ അമീന കടന്നു പോയ വഴികളിലൊക്കെ മാറ്റത്തിന്റെ കാറ്റ് ആഞ്ഞു വീശുകയായിരുന്നു.

    "ഇസ്ലാം എന്റെ ശക്തിയും ഊർജവുമാണ്...അതെന്റെ ജീവിതത്തെ അർഥ സമ്പൂർണവും മനോഹരവും ആക്കി മാറ്റി."

അമീന അസൈലിമിയുടെ ഈ വാക്കുകളും അവരുടെ ജീവിതാനുഭവങ്ങളും അല്ലാഹുവിന്റെ കാരുണ്യത്തെക്കുറിച്ചുള്ള നമ്മുടെ പ്രതീക്ഷകളെ തേജസ്സുറ്റതാക്കുന്നു.

      2010 മർച്ച് 5 ന് പുലർച്ചെ 3 മണിക്കു് ഒരു കാർ അപകടത്തെ തുടർന്ന് നമ്മുടെ പ്രിയ സഹോദരി ഈ ലോകത്തോട് വിട പറഞ്ഞു. സ്വർഗത്തിലെ ഏറ്റവും ഉന്നതമായ പദവി നൽകി അമീന അസൈലിമി  എന്ന പ്രബോധകയെ  അനുഗ്രഹിക്കാൻ കരുണാനിധിയായ അല്ലാഹുവിനോട് നാം ഓരോരുത്തരും പ്രാർത്ഥിക്കുക...

Download PDF ? Click hear

Read more »

Posted in: ഇസ്ലാം സ്വീകരിച്ച പ്രമുഖർ

ദൈവം എകനാണ്.

അളവറ്റ ദയാപരനായ പ്രപഞ്ചനാഥന്റെ നാമത്തിൽ..


ദൈവം എകനാണ്.

   ഏക ദൈവത്തിനു മാത്രമേ പ്രപഞ്ചത്തെ നേർവഴിയിലേക്കു നയിക്കാൻ കഴിയൂ. ഒരു വാഹനത്തിനു മുന്നിലും പിന്നിലും സ്റ്റിയറിംഗ് ഘടിപ്പിച്ച് ഒന്നിലേറെ ഡ്രൈവർമാർ അതിനെ നയിച്ചാൽ ആ വാഹനം മുന്നോട്ടോ പിന്നോട്ടോ പോകുകയില്ല എന്നത് ഏത് വ്യക്തിക്കും അറിയാവുന്നതാണ്. ഒരു പ്രധാന മന്ത്രിയോ, ഒരു പ്രസിഡന്റോ നാടു ഭരിക്കേണ്ടിടത്ത് അത്തരം ചുമതലക്കാർ  ഒന്നിലേറെ ഉണ്ടായാൽ അവിടെ പ്രതിസന്ധി ഉണ്ടാകുമെന്ന് യുക്തിപൂർവം പറയുന്ന മനുഷ്യർ തന്നെ ബഹു ദൈവങ്ങളെ ആരാധിക്കുന്നതിൽ വൈരുദ്ധ്യം ദർശിക്കുന്നില്ല.
                 
   ദൈവം അനാദിയും അവസാനമില്ലാത്ത പ്രതിഭാസവും കാരുണ്യനിധിയും തന്റെ സൃഷ്ടികളോട് അനുകമ്പ ചൊരിയുന്നവനും ആണ്. അവനു മയക്കമോ, ക്ഷീണമോ ഇല്ല. യതൊരു സഹായികളെയും ആവശ്യവുമില്ല.ഈ പ്രപഞ്ചത്തിലെ സകല ചരാചരങ്ങളും ദൈവത്തിന്റെ സൃഷ്ടികൾ മാത്രമാണ്. താൻ സൃഷ്ടിച്ച ഓരോ ജീവികളുടെയും ഹൃദയസ്പന്ദനങ്ങളും വികാര വിചാരങ്ങളും തിരിച്ചറിയാൻ യാതൊരു ഇടനിലക്കാരന്റെയും ആവശ്യമില്ലാത്ത കരുണാ വാരിധിയായ ദൈവം തമ്പുരാനെ വിളിച്ചു പ്രാർഥിക്കാൻ എല്ലാ സൃഷ്ടികൾക്കും തുല്യ അവകാശമാണുള്ളത്. ആഫ്രിക്കയിലെ കറുത്തവനും ഇംഗ്ലണ്ടിലെ  വെളുത്തവനും കണ്ണുകൾ പൂർണമായി തുറന്നിട്ടില്ല എന്നു തോന്നിപ്പിക്കുന്ന ചൈനാക്കാരനും എല്ലാം ദൈവത്തിന്റെ കോടതിയിൽ സമന്മാരാണ്.


   

                               (ഫോട്ടോ  കടപ്പാട് : ഗൂഗിൾ)

  ഒരാളെ കൊല്ലുന്നവനെയും ആയിരം പേരെ കൊലപ്പെടുത്തുന്നവനെയും മനുഷ്യ നിർമ്മിതമായ കോടതികളിൽ ഒരു പ്രാവശ്യം മാത്രമേ വധശിക്ഷക്കു വിധേയനാക്കാൻ കഴിയൂ. നാം ചെയ്യുന്ന ഒരു അണുമണിത്തൂക്കം നന്മയും അതുപോലെ തന്നെ തിന്മയും കൃത്യമായി രേഖപ്പെടുത്തി ഒരന്ത്യ വിധി നടപ്പാക്കാൻ കഴിയുന്ന സർവ ശക്തനാണ് അല്ലാഹു. മുസ്ലിങ്ങൾക്കു മാത്രം ഉള്ള ഒരു ദൈവമല്ല ഇത്. അല്ലാഹുവിൽ വിശ്വസിച്ചവർക്കും അല്ലാത്തവർക്കും ദൈവത്തെ നിഷേധിക്കുന്നവർക്കും എല്ലാം സ്രഷ്ടാവ് ഈ ലോകത്ത് അനുഗ്രഹങ്ങൾ ചൊരിയുന്നു.

  വെള്ളവും വെളിച്ചവും ജീവ വായുവും പ്രകൃതി വിഭവങ്ങളും നൽകുന്നു. കേവലം സൃഷ്ടികളെ ആരാധിക്കുന്നത്, മനുഷ്യ നിർമിതമായ കഥകളിൽ ആകൃഷ്ടരായി പ്രാദേശിക മൂർത്തികളിൽ അഭയം തേടുന്നത്, സങ്കുചിതമായ വിശ്വാസ പ്രമാണങ്ങളിൽ ഉറച്ചു നിന്ന് ഏകദൈവത്തെ നിഷേധിക്കുന്നത് - ഇവയെല്ലാം എന്നെയും നിങ്ങളെയും സൃഷ്ടിച്ച് പരിപാലിക്കുന്ന നാഥനോടുള്ള നന്ദികേടാണ്.

  വെറും സൃഷ്ടികളെ ആരാധിക്കുകയും ഇടനിലക്കാരുടെ ചൂഷണത്തിനു വിധേയരായി വികലമായ വിശ്വാസധാരയിലേക്കു് ജീവിതത്തെ വഴിനടത്താനും തുനിഞ്ഞാൽ ഈ ലോകവും പരലോകവും നഷ്ടപ്പെട്ടവരായി നാം അധ:പതിക്കും. നന്മ തിരിച്ചറിയാനും ഉൾക്കൊള്ളാനും നമുക്ക് ഏവർക്കും കഴിയുമാറാകട്ടെ...

Read more »

Posted in: ദൈവം

ദൈവത്തെ കണ്ടെത്താൻ...

അളവറ്റ ദയാപരനായ പ്രപഞ്ചനാഥന്റെ നാമത്തിൽ...



മതങ്ങൾ  പലതുണ്ട്...

  അവയെ ദൈവികവും മനുഷ്യ നിർമിതവുമായ നിലയിൽ തരം തിരിക്കാവുന്നതാണ് .
മനുഷ്യരിൽ ഏകദൈവ വിശ്വാസികളും ബഹുദൈവ ആരാധകരും ഉൾപ്പെടുന്നു. സാക്ഷാൽ എകദൈവത്തെ ആരാധിക്കുകയും മാനവകുലത്തെ സമത്വബോധത്തോടെ വീക്ഷിക്കുകയും ചെയ്യുന്നവരും സങ്കുചിതമായ ജാതി-കുല മഹിമകൾ വാഴ്ത്തിപ്പാടുന്നവരും വിശ്വാസികളുടെ വകഭേദങ്ങളാണ്.

     

  ജീവനുള്ളവയെയും ജീവനില്ലാത്തവയെയും ആൾ ദൈവങ്ങളെയും ആരാധിക്കുന്ന, അതിൽ സായൂജ്യം കണ്ടെത്തുന്ന, സത്യം തിരിച്ചറിയാതെ പരസ്പരം തല തല്ലിക്കീറുന്നവരാണ്  നാം. ആൾ ദൈവങ്ങൾ എന്ന അവകാശവാദം ഉന്നയിക്കുന്ന ഒരാൾക്കും ഒരു ചത്ത ഈച്ചയെ പോലും ജീവിപ്പിക്കാൻ കഴിയുന്നില്ല! മലമൂത്ര വിസർജ്ജനാദികളുള്ള, നോവും ചാവുമുള്ള , ജരാനരകൾ ബാധിച്ച് ഇത്തിരി ആയുസ്സിനൊടുവിൽ നമ്മെ പോലെ മരണം പുൽകാൻ വിധിക്കപ്പെട്ടവരാണ് ഇക്കൂട്ടർ. പക്ഷേ ഉന്നത വിദ്യാഭ്യാസം ഉള്ളവർ പോലും യാതൊരു യുക്തി ബോധവും ഇല്ലാതെ  ആൾ ദൈവങ്ങൾ എന്ന  ഇടുങ്ങിയ ചിന്തയിൽ ഊന്നിയാണ് ജീവിക്കുന്നത്.

 കല്ലും കരടും കാഞ്ഞിര വേരും മുള്ളും മുരടും മൂർഖൻ പാമ്പുമൊക്കെ നമ്മുടെ രക്ഷകരായി വരുന്ന ഇടങ്ങളിലാണ് സങ്കുചിതത്വം തല പൊക്കുന്നത്. 

  ഒരു ലോകം, ഒരു മനുഷ്യർ, ഒരു രക്ഷകൻ -കറുത്തവനും വെളുത്തവനും ഭേദങ്ങളില്ലാത്ത, അടിമക്കും ഉടമക്കും തുല്യതയുള്ള, സമ്പന്നനും ദരിദ്രനും അതിർ വരമ്പുകളില്ലാത്ത - വിശ്വാസത്തിന്റെ തീക്ഷ്ണതയും സ്ഥൈര്യവും  കൊണ്ടു മാത്രം   വിഭിന്നമാകുന്ന ഒരു സംസ്കാരം : അതാണ് ഇസ്ലാം മുന്നോട്ടു വയ്ക്കുന്നത്.

    സത്യം എപ്പോഴും ഒന്നു മാത്രം ആയിരിക്കും. എത്ര വകഭേദങ്ങൾ നാം സ്വയം സൃഷ്ടിച്ചാലും ദൈവത്തിന്റെ മുന്നിൽ കറുത്തവനും വെളുത്തവനും തുല്യർ തന്നെ. ദൈവം ഏകനാണ്... അനശ്വരനും സർവശക്തനും സകല ചരാചരങ്ങളോടും നേരിട്ടിടപെടുകയും ചെയ്യുന്ന കാരുണ്യക്കടലാണ് ...

     ആ മഹാശക്തി അറിയാതെ ഒരു ഇല പോലും ചലിക്കുന്നില്ല എന്നതാണ് വാസ്തവം. കൂരിരുട്ടിൽ കരിമ്പാറയുടെ മുകളിലൂടെ ഇഴയുന്ന കറുത്ത പുഴുവിന്റെ ഹൃദയ വ്യാപാരങ്ങൾ പോലും ദൈവം മനസ്സിലാക്കുന്നു.

Read more »

Posted in: ദൈവം